Sesionet e Takimit I

Kapitali Fillestar dhe Shitja e Aksioneve

Mësoni bazat për sigurimin e kapitalit dhe pjesëmarrjen e aksionarëve

Shoqëria që ju do të krijoni ka nevojë për kapital fillestar. Në shoqëritë “Junior Achievement”, kjo arrihet duke i shitur aksione publikut me çmimin 200 lekë për copë.

Kjo u jep mundësinë punonjësve, miqve dhe të afërmve të marrin pjesë në pronësinë dhe suksesin e shoqërisë suaj.

Shitja e aksioneve fillon pas Takimit II dhe përfundon në Takimin V, kur shoqëria juaj miraton planin e biznesit dhe fillon prodhimin. Gjatë kësaj periudhe duhet të sigurohet kapitali i nevojshëm për të filluar veprimtarinë e shoqërisë.

Kujdes: Përkufizimet e termave kyçe (të shënuara me shkrim të theksuar), si dhe terminologjia e biznesit, gjenden në fjalorin në fund të kursit.

Të gjithë formularët mund të gjenden në:

• Shtojca
• Të përmendur përgjatë takimeve
• Ose mund të sigurohen nga vullnetari i JA

Certifikatat e aksioneve JA janë si aksione të rregullta. Ato përfaqësojnë pjesën e pronësisë në shoqëri dhe përfshijnë të drejta vote. Një punonjës duhet të zotërojë një aksion për të marrë pjesë në bordin e drejtorëve.

Kur shoqëria përfundon veprimtarinë dhe shkon drejt likuidimit, fitimet ndahen midis aksionarëve duke përllogaritur vlerën e mbetur të aksionit. Vlera e mbetur është shuma e dividentëve, që do t’u shpërndahet aksionarëve, pasi të jenë paguar:

• Taksat dhe tatimet
• Pagat
• Dhurimet humanitare
• Shpërblimet
• Të gjitha faturat

Shoqëria juaj do të fillojë të shesë aksione në Takimin II. Ju duhet të njiheni me procedurat bazë për të vepruar me sukses në takimin e ardhshëm.

Shitja e Aksioneve

Udhëzime për të vepruar saktë dhe për të garantuar informacion të qartë

Kur komunikoni me investitorë të mundshëm, përgatituni t’u përcillni informacionin e mëposhtëm:

• Ju po shisni aksione të shoqërisë Junior Achievement.
• Çdo aksion kushton 200 lekë.
• Fitimi ose kthimi i investimit nuk është i garantuar, por në shumicën e rasteve investitorët:
  • Marrin investimin e tyre fillestar
  • Dhe një dividend aksioni
• Departamenti i Burimeve Njerëzore do t’u shpërndajë certifikata aksioni të gjithë punonjësve të shoqërisë.

Kur ju bëni një shitje, ju duhet të:

• Plotësoni informacionin e kërkuar në:
  • Certifikatën e aksionit
  • Kartelën e informacionit të aksionarit
• Siguroni që informacioni të jetë i saktë – kjo është me rëndësi thelbësore për shpërndarjen e dividentëve gjatë likuidimit të shoqërisë.
• Prezantojini aksionarit certifikatën e aksionit.
• Jepini drejtorit të Burimeve Njerëzore kartelën e informacionit të aksionarit dhe shumën e parave drejtorit të Departamentit të Financës.
• Të gjitha shitjet e aksioneve duhet të regjistrohen në zarfin e regjistrimit të aksionarëve.

Zgjedhja e emrit të Shoqërisë dhe imazhit

Udhëzime për të ndërtuar një emër dhe identitet që frymëzon besim dhe profesionalizëm

A është mirë të zgjidhni një emër biznesi që ju kujton një person, një vend apo një kulturë? A duhet të jetë ky emër interesant apo i zgjuar? A përcjell emri autoritet ose interes?

Emri i shoqërisë duhet të frymëzojë besim dhe të përçojë një perceptim profesional. Duhet të jetë i qartë dhe i lehtë për t’u mbajtur mend.

Shembuj & Inspirime

Gjatë procesit të përzgjedhjes, kërkoni shembuj të shoqërive me emra unikë. Një shembull interesant është:

Emrat interesantë mund të ndihmojnë ose pengojnë. Për shembull:

• “Ushqim me shumicë” – mund të jetë një gjetje e zgjuar, por jo domosdoshmërisht tërheqëse për klientin.
• “Kolonat” – emër i thjeshtë, me kuptim lokal, që shoqërohet me sukses falë teknikave të marketingut dhe identitetit të qartë.

Sloganet dhe Logot

Sloganet dhe logot ndihmojnë për të përforcuar imazhin dhe për të qartësuar qëllimin e shoqërisë. Disa slogane të njohura përfshijnë:

• “Fitoni çdo sfidë” – Raiffeisen Bank
• “Çlironi lumturinë” – Coca-Cola
• “Bankë për të gjithë” – ProCredit
• “Banka që dua” – Union Bank

Imazhi i markës si pasuri

Kur një shoqëri blihet ose shitet, një element i quajtur "imazhi i markës" përbën pjesë të rëndësishme të vlerës totale. Kjo është një pasuri e patundshme që lidhet drejtpërdrejt me emrin e shoqërisë.

Emri përcjell shumë gjëra: audiencë, çmim, lloj produkti, identifikim, tërheqje dhe shumë më tepër!

Kur ta zgjidhni emrin?

Mund të vendosni një emër gjatë takimit I ose të prisni deri në II, pasi të keni përzgjedhur produktin.

Do të keni në vijim të leksionit një Forum (publik për të gjithë) ku mund të jepni mendimet tuaja dhe të diskutoni mbi emrin e kompanisë tuaj. 

Struktura e Shoqërisë & Roli i Çdo Anëtari

Kuptoni rëndësinë e çdo anëtari për suksesin e shoqërisë

A e keni parë ndonjëherë shiritin e titrave në përfundim të një filmi? Lista e pjesëmarrësve radhit të gjithë njerëzit — aktorët, shkrimtarët, producentët, drejtorët, operatorët, redaktorët e filmit, grimierët dhe shumë të tjerë — që kanë punuar së bashku për të prodhuar filmin.

Ju mund të mendoni se një shoqëri filmi është unike, por pothuajse çdo biznes i suksesshëm mbështetet në përpjekjet e përbashkëta, në aftësitë dhe talentet e punonjësve të tij.

Madje, edhe një skuadër sportive e suksesshme ka nevojë për më shumë se vetëm sportistë të talentuar. Instruktorët, trajnerët dhe të tjerë punojnë në prapavijë për të siguruar që sportistët të jenë të shëndetshëm dhe në formë.

Menaxherët, avokatët, stafi i marketingut dhe i marrëdhënieve me publikun, si edhe profesionistë të tjerë, mbajnë regjistrat financiarë, planifikojnë fushata marketingu dhe përmbushin detyra të tjera të rëndësishme për suksesin.

Plani i Veprimit

• Përgatitni një fjalim një-minutësh, në rast se do të aplikoni për pozicion drejtues.
• Familjarizohuni me procedurat bazë të shitjes së aksioneve për të vepruar me siguri gjatë takimit.