Takimi II - Departamenti i Burimeve Njerëzore

Departamenti i Burimeve Njerëzore

Roli dhe përgjegjësitë

Urime që u zgjodhët për të qenë pjesë e Departamentit të Burimeve Njerëzore në shoqërinë e re! Ju do të jeni përgjegjës për hartimin e planit të kompensimit për shoqërinë tuaj, si dhe për sigurimin e informacionit në lidhje me listë-prezencën, listë-pagesat, kontratën e shoqërisë, si dhe për të tjera të dhëna të rëndësishme për shoqërinë.

Puna juaj është nga më të rëndësishmet në shoqëri. Së bashku me presidentin ju do të jeni përgjegjës për moralin e punonjësve, si dhe për t’i ndihmuar ata të punojnë si një skuadër. Krahas këtyre ju do të jeni përgjegjës për dhënien e pagave të llogaritura mirë dhe brenda afateve të caktuara.

Përgjegjësitë kryesore

Përgjatë gjithë veprimtarisë së programit “Shoqëritë e nxënësve”, Departamenti i Burimeve Njerëzore është përgjegjës për:

• Planin e biznesit për Departamentin e Burimeve Njerëzore;
• Listë-prezencën;
• Të dhënat administrative;
• Certifikatat e aksioneve;
• Zarfin e regjistrimit të aksionarëve;
• Regjistrin e aksionarëve, duke filluar që në takimin II deri në likuidimin e shoqërisë.

Të Dhënat e Rëndësishme të Biznesit

Plani i kompensimit

Një përshkrim të planit të kompensimit mund ta gjeni në statut. Gjatë takimit II, shoqëria juaj duhet të miratojë standardet e programit “Shoqëritë e nxënësve” ose të bëjë plotësimin e tyre dhe të miratojë një version të ndryshuar. Kini parasysh që çdo ndryshim i statutit duhet të pasqyrohet në planin e biznesit të Departamentit të Burimeve Njerëzore.

Të dhënat administrative

Departamenti i Burimeve Njerëzore është përgjegjës për mbajtjen e regjistrimeve të sakta lidhur me pjesëmarrjen, listë-pagesat, si edhe për përditësimin e të dhënave për punonjësit dhe konsulentët që punojnë për shoqërinë (duke përfshirë emrat, adresat, numrat e telefonit dhe adresat e postës elektronike).

Informacioni i listë-pagesës

Departamenti i Burimeve Njerëzore është përgjegjës për llogaritjen e pagave për të ndihmuar Departamentin e Financës në përgatitjen e çeqeve të pagesave gjatë likuidimit.

Listë-prezenca

Regjistri i shoqërisë për listë-prezencën duhet të jetë i plotë dhe i saktë. Burimet Njerëzore duhet të regjistrojnë prezencën në çdo takim. (Kini parasysh t’i prisni ata që mbërrijnë me vonesë).

Mungesat e shumta janë një problem serioz dhe shpeshherë janë një tregues i mospërmbushjes së nevojave të punonjësve nga ana e shoqërisë. Merrni parasysh mundësinë e marrjes në telefon të personit që mungon, për të zbuluar nëse ka probleme, të cilat mund t’i zgjidhin drejtuesit ose vullnetarët. Duhet të kini parasysh që edhe ndonjë sëmundje e papritur ose ndonjë konflikt tjetër mund të jenë shkak për mungesat.